Negociatorët iranianë dhe amerikanë do të rifillojnë bisedimet të premten në Romë për të zgjidhur një mosmarrëveshje që zgjat prej dekadash mbi ambiciet bërthamore të Teheranit, pavarësisht paralajmërimit të udhëheqësit suprem të Iranit se arritja e një marrëveshjeje të re mund të jetë e pamundur për shkak të përplasjes së vijave të kuqe. Rreziqet janë të larta për të dyja palët. Presidenti Donald Trump dëshiron të kufizojë potencialin e Teheranit për të prodhuar një armë bërthamore që mund të shkaktojë një garë rajonale të armëve bërthamore. Irani, nga ana e tij, dëshiron të heqë qafe sanksionet shkatërruese mbi ekonominë e tij të bazuar te nafta. Ministri i Jashtëm iranian Abbas Araqchi dhe i dërguari i Trump në Lindjen e Mesme, Steve Ëitkoff, do të zhvillojnë një raund të pestë bisedimesh, të ndërmjetësuara nga Omani, pavarësisht se Uashingtoni dhe Teherani kanë mbajtur një qëndrim të ashpër publikisht mbi pasurimin e uraniumit të Iranit. Edhe pse Irani këmbëngul se bisedimet janë indirekte, zyrtarët amerikanë kanë thënë se diskutimet, përfshirë raundin e fundit më 11 maj në Oman, kanë qenë si "të drejtpërdrejta ashtu edhe të tërthorta". Teherani dhe Uashingtoni kanë thënë të dy se preferojnë diplomacinë për të zgjidhur ngërçin, por mbeten thellësisht të ndarë në disa vija të kuqe që negociatorët do të duhet t'i kapërcejnë për të arritur një marrëveshje të re bërthamore dhe për të shmangur veprimet ushtarake në të ardhmen. Sekretari amerikan i Shtetit, Marco Rubio, tha të martën se Uashingtoni po punon për të arritur një marrëveshje që do t'i lejonte Iranit të ketë një program të energjisë bërthamore civile, por jo të pasurojë uranium, ndërsa pranoi se arritja e një marrëveshjeje të tillë "nuk do të jetë e lehtë". Udhëheqësi Suprem, Ajatollah Ali Khamenei, i cili ka fjalën e fundit për çështjet shtetërore, hodhi poshtë kërkesat e Uashingtonit që Teherani të ndalojë pasurimin e uraniumit duke i quajtur ato "të tepërta dhe të egra", e duke paralajmëruar se bisedimet nuk ka gjasa të japin rezultate.