Një aksident i rëndë është shënuar mbrëmjen e së dielës, rreth orës 18:45, në aksin rrugor "Pogradec-Qafë Thanë”, në fshatin Mëmëlisht. Sipas Policisë, një automjet ka përplasur këmbësorin 55 vjeç, të identifikuar si Ilir Mimini, banues në Mëmëlisht dhe është larguar nga vendngjarja. 55-vjeçari si pasojë e përplasjes ka ndërruar jetë në vendngjarje. Pak minuta më vonë autori ka braktisur mjetin pranë stacionit të trenit në qytetin e Pogradecit. Mësohet se ky i fundit i ka hequr targat dhe është larguar duke e lënë mjetin në këtë zonë. Policia konfirmon se është pikërisht ky mjet që ka bërë aksidentin dhe mësohet se është identifikuar edhe autori.