Ish-deputetja e Partisë Demokratike, Lajla Përnaska do të garojë për Bashkinë e Tiranës nën siglën e partisë së Shpëtim Idrizit. Përnaska ka dorëzuar në Komisionin Qendror të Zgjedhjeve dokumentacionin e regjistrimit si kandidate. Ish-studente e Sali Berishës, Përnaska ka mbajtur për dy mandate postin e deputetit nën siglën e Partisë Demokratike. Për herë të parë u zgjodh deputete në 2005-n dhe u rizgjodh në 2009-n. Gjatë karrierës në politikë ka mbajtur edhe postin e kryetarit të Komisionit të Shëndetësisë për dy vite, si dhe atë të anëtares në Komisionin parlamentar të politikës së jashtme. Bashkë me Përnaskën, kandidatët për Bashkinë e Tiranës bëhen pesë. Erion Veliaj kandidon nga socialistët, Belind Këlliçi nga Foltorja, Roland Bejko nga PD zyrtare dhe Arlind Qori nga Lëvizja Bashkë.