Të paktën 158 persona raportohet se anë humbur jetën si pasojë e përmbytjeve më vdekjeprurëse që kanë goditur Spanjën në historinë e saj moderne, pasi shiu i rrëmbyeshëm goditi rajonin lindor të Valencias, duke marrë me vete ura dhe ndërtesa, thanë autoritetet lokale. Banorët e Valencias thanë për BBC se të gjithë ata njohin dikë që ka vdekur nga vërshimi I ujit. Ndërsa po vijojnë kërkimet për të zhdukurit .Meteorologët thanë se shiu i një viti kishte rënë në tetë orë në pjesë të Valencias të martën, duke shkaktuar aksidente zinxhir në autostrada dhe zhytjen nën ujë të tokës bujqësore në një rajon që prodhon dy të tretat e agrumeve në Spanjë, një eksportues kryesor global. Banorët në vendet më të goditura thanë se kishin parë njerëz duke u ngjitur mbi çatitë e makinave të tyre, ndërsa një valë uji bojëkafe shpërtheu nëpër rrugë, duke shkulur pemët dhe duke shembur mure ndërtesash. "Ishte si një tsunami," thotë Denis Hlavaty, i cili priti skuadrat e shpëtimit, i ngjitur mbi një parvaz në pikën e karburantit ku ai punonte. "Unë e kalova natën atje, i rrethuar nga uji që ishte 2 metra i thellë." Ministrja e Mbrojtjes Margarita Robles tha se një njësi ushtarake e specializuar në operacionet e shpëtimit do të fillojë të enjten të kërkojë të zhdukurit me qen nuhatës në zonat më të goditura. E pyetur nëse numri i viktimave ka gjasa të rritet, ajo tha: “Për fat të keq nuk jemi optimistë”. Kryeministri Pedro Sanchez premtoi të rindërtojë infrastrukturën e shkatërruar dhe tha në një fjalim televiziv: "Për ata që në këtë moment ende kërkojnë të dashurit e tyre, e gjithë Spanja qan me ju". Pamjet e xhiruara nga shërbimet e urgjencës nga një helikopter treguan ura që ishin shembur dhe makina dhe kamionë të grumbulluar mbi njëri-tjetrin në autostradat mes fushave të përmbytura jashtë qytetit të Valencias. Trenat për në qytetet e Madridit dhe Barcelonës u anuluan për shkak të përmbytjeve dhe shkollat dhe shërbimet e tjera thelbësore u pezulluan në zonat më të goditura, thanë zyrtarët.