Mbi 140 shtëpi janë përmbytur në Qarkun e Shkodrës nga reshjet e dendura të shiut që nisën mbrëmjen e së shtunës dhe vijuan përgjatë gjithë ditës së diel. Situata më problematike paraqitet në Bashkinë e Vaut të Dejës, ku autoritetet thonë se prania e ujit është konstatuar në 100 banesa, ndërsa disa hektarë tokë janë përmbytur për shkak të prurjeve të menjëhershme dhe të mëdha të përroit të Glinës. Emergjencat civile deklarojnë se në lidhje me përroin e Glinës, është e domosdoshme kryerja e investimeve rehabilituese për të shmangur pasojat e përmbytjeve. Në këtë bashki janë raportuar rrëshqitje dherash dhe përmbytje infrastrukture në rrugët kryesore dhe dytësore të qytetit dhe fshatrave, ndërsa deri mbrëmjen e së dielës një familje është evakuuar. Në Bashkinë e Shkodrës uji ka përmbytur rreth 45 banesa në njësitë administrative Guri i Zi dhe Bërdicë. Emergjencat civile deklarojnë se në këto dy njësi rreth 70 për qind e tokës bujqësore është përmbytur nga uji, duke shkaktuar miliona lekë humbje në të mbjella.