Një sasi "kolosale" uji po lëviz drejt qytetit rus të Kurganit, tha guvernatori i rajonit. Vadim Shumkov tha se lumi i tejfryrë Tobol dhe degët e tij kishin prodhuar nivele uji dy herë më të larta se në përmbytjet e fundit të mëdha të regjistruara në 1994. Përmbytjet gjatë dy javëve të fundit kanë detyruar evakuimin e dhjetëra mijëra njerëzve nga Kazakistani verior dhe zonat kufitare të Rusisë. Ato po shkaktohen nga shkrirja e shpejtë e borës dhe akullit, kombinuar me shiun e dendur. Në kanalin e tij në Telegram, Shumkov u bëri thirrje të gjithë banorëve në zonat e kërcënuara nga përmbytjet që të largohen menjëherë nga shtëpitë e tyre, me nivelin e ujit që pritet të rritet deri në 11 metra mbi normalen. "Kjo nuk është vetëm një përmbytje, është një kërcënim i madh!" tha ai. "Prandaj, merrni fëmijët, të moshuarit, të afërmit që kanë vështirësi në lëvizje dhe fqinjët e dërgoini në një strehë të përkohshme ose te miqtë dhe të njohurit. Mblidhni dokumentet dhe sendet me vlerë." Kurgani, një qytet me më shumë se 300,000 banorë, është vendndodhja e fabrikës ushtarake Kurganmashzavod, prodhimi i së cilës përfshin automjete luftarake të këmbësorisë dhe tanke të lehta. Nga mediat e huaja ka pasur spekulime se në një moment, edhe kjo fabrikë mund të jetë në zonën e përmbytjes.