Afro 50,000 personave u është bërë thirrje që të evakuohen nga shtëpitë e tyre, ndërsa përmbytjet kanë goditur qytetin më të madh australian, Sidnej, për të tretën herë me radhë gjatë këtij viti. Disa pjesë të Sidnejit janë përballur me reshje të dendura shiu në katër ditët e fundit. Rrugët janë bllokuar dhe disa shtëpi janë përmbytur, ndërsa mijëra persona kanë mbetur pa energji elektrike. Përmbytjet në mbarë Australinë – që janë nxitur nga fenomeni i motit i njohur si La Niña (la ninja) – i kanë marrë jetën deri më tanimbi 20 personave. Mbi 100 evakuime janë urdhëruar në mbarë Sidnejin për shkak të emergjencës aktuale. Edhe qytetarët në 50 zona të tjera janë paralajmëruar që të përgatiten që të evakuohen, për shkak se disa lumenj të mëdhenj janë tejmbushur dhe kanë dalë nga shtrati. Reshje shiu pritet të ketë edhe të martën në Sidnej, por po ashtu është parashikuar që të ketë erëra të fuqishme, që rrisin rrezikun e rrëzimit të pemëve dhe shtyllave elektrike. “Emergjenca ende nuk kanë kaluar”, tha ministrja e Emergjencave, Stephanie Cook. Ekspertët thonë se përmbytjet janë shpeshtuar dhe janë bërë më katastrofikepër shkak të ndryshimeve të klimës si edhe nga fenomeni i motit La Niña. Ky i fundit shkakton erëra të fuqishme në zonat e Paqësorit deri në Indonezi.