Bilanci i viktimave nga tërmeti shkatërrues në Kolumbi ka shkuar në 224 persona. Sipas një përllogaritjeje të CNN, bazuar në raportimet e autoriteteve dhe agjencive në vend, nëntë viktima të tjera janë konfirmuar në departamentin e Chocó, në perëndim të vendit. Guvernatorja e kësaj zone bëri të ditur se në këtë departament janë regjistruar gjithashtu 138 persona të plagosur, ndërsa pesë të tjerë vijojnë të konsiderohen të zhdukur. Ekipet e emergjencave dhe vullnetarët po vijojnë kërkimet në zonat e prekura, ndërsa autoritetet paralajmërojnë se bilanci mund të rritet më tej, pasi ka ende persona që mund të ndodhen nën rrënoja. Tërmeti me magnitudë 7.4, i regjistruar në një thellësi prej rreth 107 kilometrash, shkaktoi dëme të mëdha në ndërtesa, spitale dhe infrastrukturë. Shërbimi Gjeologjik i Kolumbisë e ka cilësuar atë si tërmetin më të fuqishëm të regjistruar në vend gjatë shekullit XXI. Pas goditjes së parë janë regjistruar të paktën 21 paslëkundje dhe autoritetet presin të tjera. Ndërkohë, në disa zona është vendosur shtetrrethim për të parandaluar grabitjet, ndërsa ushtria është angazhuar për të garantuar sigurinë dhe për të mbështetur operacionet e shpëtimit.