Kaosit dhe flakadanëve të opozitës në seancat plenare të Kuvendit, socialistët u janë përgjigjur me futjen me procedurë të përshpejtuar të ndryshimeve në rregulloren e Kuvendit, ku propozohet që të gjashtëfishohen masat disiplinore. Rregullorja aktuale përcakton përjashtimin e deputetëve deri në 10 ditë maksimumi. Socialistët propozojnë që në varësi të shkeljes, përjashtimi i deputetëve të rritet me 30 deri në 60 ditë. Përjashtimet deri në 30 ditë përfshijnë rastet kur deputeti përdor dhunë fizike ndaj deputetëve të tjerë apo Gardës së Republikës, si dhe kur deputeti përmes veprimeve të dhunshme dëmton pajisjet në sallën e seancave apo mbledhjes. Ndërsa masa disiplinore përjashtim deri në 60 ditë, jepet në rastet kur deputeti përdor lëndë apo mjete piroteknike, tymuese, bojëra dhe mjete të tjera të ngjashme brenda sallës së zhvillimit të punimeve të Kuvendit ose mbledhjes së komisionit, si dhe kur deputeti kryen veprime që përbëjnë shkelje që konfigurohen si shkelje penale. Kërkesa për marrjen e masës disiplinore, paraqitet me shkrim nga jo më pak se 7 deputetë dhe jo më vonë se 48 orë nga dita e konstatimit të rasteve. Socialistët planifikojnë që të miratojnë këto ndryshime në seancën e 14 dhjetorit.