Një avion Airbus A321 i kompanisë Lufthansa me 177 pasagjerë dhe 7 persona të ekuipazhit, është detyruar të kryejë ulje emergjente për shkak të një problemi Teknik në aeroportin “Eleftherios Venizelos” në Athinë, vetëm pak minuta pasi është ngritur në ajër. Avioni kishte si destinacion Mynihun, ndërsa sipas mediave greke problemi Teknik u konstatua gjatë fluturimit. Piloti ka kërkuar kthimin menjëherë në aeroport për arsye sigurie, vetëm 6 minuta pasi ishte ngritur nga pista. Ulja u realizua pa probleme, megjithatë menjëherë pas ndalimit të avionit u aktivizuan procedurat e evakuimit emergjent, duke aktivizuar rrëshqitëset fryrëse të emergjencës, ndërsa pasagjerëve iu kërkua të largoheshin sa më shpejt nga kabina. Sipas autoriteteve greke, ekuipazhi dhe pasagjerët janë në gjendje të mirë shëndetësore por gjatë evakuimit pati dy lëndime të lehta.