Presidenti Donald Trump e ka hedhur poshtë përgjigjen e Iranit ndaj propozimeve të SHBA-së për t'i dhënë fund luftës si "krejtësisht të papranueshme". Agjencia gjysmëzyrtare e lajmeve Tasnim e Iranit tha se propozimi i Teheranit, i dërguar nëpërmjet Pakistanit, i cili ka shërbyer si ndërmjetës, përfshinte një përfundim të menjëhershëm të luftës në të gjitha frontet, një ndalim të bllokadës detare amerikane të porteve iraniane dhe garanci për mos kryerjen e sulmeve të mëtejshme ndaj Iranit. Një armëpushim që synonte të lehtësonte bisedimet për t'i dhënë fund luftës së nisur nga SHBA-të dhe Izraeli në shkurt është respektuar kryesisht, pavarësisht shkëmbimeve të rastit të zjarrit. Më herët këtë javë, Trump përsëriti se lufta në Iran do të "mbarojë shpejt". Sipas medias shtetërore iraniane, propozimi i Teheranit përfshin një kërkesë për kompensim për dëmet e luftës dhe vendos një theks të vecantë në sovranitetin iranian mbi Ngushticën e Hormuzit. Të dielën, Presidenti iranian Masoud Pezeshkian nuk iu referua drejtpërdrejt propozimit të Teheranit, por tha: "Ne kurrë nuk do të ulim kokën para armikut, dhe nëse lind nevoja për dialog ose negociata, kjo nuk do të thotë dorëzim ose tërheqje." Trump në anën tjetër shkroi në Truth Social: "Sapo lexova përgjigjen nga të ashtuquajturit 'Përfaqësues' të Iranit. Nuk më pëlqen - Plotësisht e papranueshme".