Tre përplasje të forta mes automjeteve tronditën dhe përgjakën rrugët e Shqipërisë, mëngjesin e kësaj të diele. Shkak u bë mosrespektimi i rregullave të qarkullimit rrugor, apo edhe mungesa e infrastructurës. Aksi Kardhiq Delvinë është shndërruar në një njollë të errët për policinë rrugore. Këtë të diel, u shënua për të tretën herë radhazi, në harkun kohor të vetëm pak javëve, një aksident automobilistik ku të përfshirë ishin tre shtetas amerikanë. Aksidenti u shënua rreth orës 8 të kësaj të diele, ku mjeti humbi kontrollin në aksin në ndërtim Kardhiq- Delvinë, rreth 200 metër larg tunelit të qafës së Skërficës. Mjeti doli nga rruga dhe u përmbys disa metra në një terren të pjerrët. Në vendngjarje mbërritën menjëherë efektivët e policisë si dhe ambulanca. Tre shtetasit e plagosur u dërguan me urgjencë në spital, ku ndodhen jashtë rrezikut për jetën.