Bota ka hyrë në një "zonë rreziku të motit ekstrem", ndërsa pasojat e El Niño-s fillojnë të ndihen globalisht, paralajmëroi kreu i OKB-së, António Guterres. Organizata Botërore Meteorologjike ka publikuar të dhënat më të fundit mbi fenomenin natyror të motit, duke treguar se ai mund të jetë më i forti në më shumë se 70 vjet dhe të zgjasë të paktën deri në shkurt 2027. El Niño ndryshon modelet e motit në të gjithë botën, duke i shtyrë disa rajone në thatësirë, ndërsa të tjerët përjetojnë tajfune dhe përmbytje më të forta. Parashikuesit e motit thonë gjithashtu se El Niño do të rrisë temperaturat në disa vende, bashkë me rritjen e nxehtësisë globale nga ndryshimet klimatike të shkaktuara nga njeriu. "El Niño po zmadhohet shumë para syve tanë. Shkenca nuk lë vend për dyshim: planeti është në ujëra të paeksploruara më parë dhe ato ujëra po ngrohen", tha Guterres. Organizata botërore Meteorologjike, një agjenci e OKB-së, tha se është mobilizuar për të provuar të qarkullojë parashikimet e saj për ngjarje të mundshme ekstreme të motit, të lidhura me El Niño-n, në sa më shumë komunitete të jetë e mundur. El Niño është një fenomen natyror i motit që zhvillohet në Oqeanin Paqësor dhe lidhet me një ndryshim në modelet e erës. Ai lejon që uji i ngrohtë të përhapet drejt lindjes dhe të lëshojë nxehtësi në atmosferë. Temperaturat e detit në Paqësorin tropikal qendror dhe lindor janë rritur ndjeshëm në muajt e fundit, një shenjë e qartë e një El Niño në forcim. Në rajonin kryesor të monitorimit të Paqësorit, temperaturat sipërfaqësore kanë qenë shumë mbi 2 gradë Celsius mbi mesataren në javët e fundit, duke e vendosur atë në rrugën e duhur për t'u shpallur një ngjarje "shumë e fortë". Por fenomeni pritet të tejkalojë edhe këtë tregues. Temperaturat mujore të sipërfaqes së detit mund të afrohen me 4 gradë Celsius mbi mesataren, sugjerojnë parashikimet. Kjo do ta bënte këtë El Niño më të fortin që nga të paktën viti 1950.