Irani ka nisur të ndërtojë një unazë mbrojtëse prej çeliku rreth objektit të tij më të rëndësishëm bërthamor, në mesin e kërcënimeve për sulme ajrore nga SHBA dhe Izraeli. Udhëheqësi suprem Ayatollahu Ali Khamenei po përgatitet për një sulm të mundshëm pasi Presidenti Donald Trump kërcënoi se do të bombardonte regjimin "si kurrë më parë". Irani po forcon dy komplekse tunelesh të groposura thellë, të lidhura me kompleksin e tij kryesor bërthamor, me një perimetër masiv sigurie. Imazhet satelitore tregojnë ndërtimin e mbrojtjes rreth bazës në malin Kolang Gaz La, që ndodhet në jug të kompleksit të pasurimit të uraniumit në Natanz. Imazhet satelitore, treguan hyrje të fortifikuara në komplekse, panele të larta që rrethojnë majën e malit dhe gërmime për instalimin e më shumë elementëve mbrojtës. Ana veriore e perimetrit bashkohet me unazën e sigurisë së uzinës Natanz, sipas një raporti të publikuar nga Instituti për Shkencën dhe Sigurinë Ndërkombëtare. Nën mal gjendet një kompleks i ri tunelesh, të zhytur thellë si edhe një kompleks i veçantë, më i vogël që daton në vitin 2007, që më parë ishte shkatërruar pjesërisht. Teherani ua ka ndaluar hyrjen në tunele inspektorëve të Agjencisë Ndërkombëtare të Energjisë Atomike të OKB-së, të cilët monitorojnë programin e tij bërthamor. Kjo sugjeron se Irani është gjithnjë e më i shqetësuar për mbikëqyrjen e huaj të vendeve të tij të prodhimit bërthamor, për të cilat regjimi pretendon se janë vetëm për përdorim civil. Lëvizja e Iranit për të siguruar vendin e tij bërthamor vjen pasi ushtria izraelite dhe amerikane thuhet se kanë planifikuar të godasin regjimin iranian dhe të zhdukin vendet e tij bërthamore brenda vetëm disa javësh. Presidenti izraelit Benjamin Netanyahu thuhet se ka zhvilluar bisedime të profilit të lartë me Presidentin amerikan Donald Trump për të nisur një sulm komandosh dhe për të lëshuar bomba 15 tonëshe mbi Iranin, me ndihmën e avionëve luftarakë amerikanë.