Kur na ndajnë vetëm nëntë ditë nga zgjedhjet parlamentare të 2021, komisioneri shtetëror i zgjedhjeve, Ilirjan Celibashi nëpërmjet një postimi në rrjetin social facebook ka bërë me dije se janë printuar dhe paketuar fletët e votimit. Kryekomisioneri ka theksuar se procesi i paketimin dhe printimit është përfunduar për gjashtë qarqe të vendit, konkretisht për qakun: Vlorë, Korçë, Berat, Gjirokastër, Elbasan dhe Fier. Celibashi shkruan se fletët e votimit pritet të mbërrijnë në Shqipëri brenda ditës së sotme. Diskutime të shumta kanë shoqëruar miratimin e fletës së votimit në këto zgjedhje parlamentare. Fillimisht, formati i fletës së votimit ka qenë ai në të cilën paraqiteshin emrat e kandidatëve për deputet në secilin qark. Por ky format u rrëzua nga kolegji zgjedhor dhe pas disa ankimimeve nga partitë politike dhe diskutimeve në Komisionin Qëndror të Zgjedhjeve u vendos përfundimisht fleta e votimit me numrat e partive dhe kandidatëve përkatës.