Pas 12 orësh të mbetur të bllokuar në malin e Bogës, një grup alpinistësh janë shpëtuar. 5 alpinistë shqiptarë kishin mbetur të bllokuar gjatë eksplorimit në vendin e quajtur “Maja e Çardakut” në Bogë, pasi njëri prej tyre kishte dëmtuar rëndë këmbën. Rreth orës 16:50 të ditës së dielë, aplinistët kishin dhënë njoftim se kishin mbetur të bllokuar. Pas marrjes së njoftimit, shërbimet e Policisë dhe ato mbështetëse kanë organizuar një operacion kërkim-shpëtimi dhe pas 12 orësh kërkime gjatë natës dhe gjatë orëve të mëngjesit të sotëm, është bërë e mundur gjetja dhe shpëtimi i grupit të alpinistëve. 26-vjeçari që kishte dëmtuar këmbën është dërguar për ndihmë mjekësore në Spitalin Rajonal Shkodër dhe është jashtë rrezikut për jetën. Operacioni i kërkim-shpëtimit u krye nga Policia Alpine e Forcave Kombëtare të Sigurisë, në bashkëpunim me shërbimet e Komisariatit të Policisë Malësi e Madhe dhe me Emergjencat Civile, si dhe një grup vullnetarësh.