Një avion pasagjerësh i mbushur plot me njerëz u përfshi nga flakët ndërsa u ul në pistë, duke detyruar një evakuim masiv të gati 300 personave në bord dhe mbylljen e aeroportit. Fluturimi i Turkish Airlines, i nisur nga Stambolli për në Katmandu, mori flakë pasi një shkëndijë shpërtheu në marshin e uljes së avionit, thanë autoritetet. Një zëdhënës i agjencisë së aviacionit civil të Nepalit tha: "Të gjithë në bord janë të sigurt, pjesa e shpëtimit ka mbaruar. Tani po hetojmë aksidentin". Pista e vetme e aeroportit u mbyll për gati dy orë të hënën në mëngjes pas përvojës së frikshme, por që atëherë është rihapur. Disa fluturime hyrëse u pezulluan pas ngjarjes ndërsa pista u kontrollua dhe u pastrua. Një zëdhënës i Turkish Airlines tha se ka nisur një inspektim teknik i avionit nga ekipet e kompanisë dhe vlerësimet fillestare tregojnë se zjarri u shkaktua nga një mosfunksionim teknik në një tub hidraulik. Tymi u pa duke dalë nga goma e pasme e djathtë e aeroplanit ndërsa ai u ul në Aeroportin Ndërkombëtar Tribhuvan në kryeqytetin e Nepalit. Në bord kishte 277 pasagjerë dhe 11 pjesëtarë të ekuipazhit, që u evakuuan përmes daljes së emergjencës. Flakët në avion u shuan dhe mjeti më pas u tërhoq në mënyrë të sigurt në pistën e parkimit.