Pas direktivave të kryesocialistit Edi Rama në asamblenë kombëtare, puna me anëtarësimet e reja në partinë socialiste ka vijuar në të gjitha degët. Ecuria e procesit të rienergjizimit të partisë dhe vlerësimi i rezultateve do të bëhet më 16 mars, ditë kur mblidhet asambleja kombetare në Durrës. Të dhënat e deritanishme tregojnë se në total ka pasur 2105 anëtarësime të reja në Partinë Socialiste. Qarku i Elbasanit me drejtues Damian Gjiknurin kryeson me shpërndarjen e 235 karta anëtarësie. Në vend të dytë për nga numri i anëtarësimeve të reja qëndron Tirana me 231 karta anëtarësie. Drejtuesi politik, Erion Veliaj prej disa ditësh ka filluar procesin e anëtarësimeve të reja në çdo njësi të Tiranës, në kuadër të platformës së rienergjizimit të qelizës bazë të partisë. Në vend të tretë, sa i takon anëtarësimeve të reja, qëndron qarku i Fierit me drejtues politik, Taulant Ballën ku janë shpërndarë 204 karta anëtarësie.