Rusia po i përdor afrikanët si "mish për top" duke i mashtruar ata që të bashkohen me luftën në Ukrainë, tha ambasadori i Kievit në Afrikën e Jugut. Mijëra afrikanë mendohet se janë joshur për në vijën e frontit, ose me pretekste të rreme ose me premtime për paga të majme, në një operacion të Moskës për të zëvendësuar viktimat e shumta në radhët e veta. Olexander Scherba i tha britanikes The Telegraph se një skandal i kohëve të fundit, në të cilin anëtarët e një partie politike të Afrikës së Jugut me lidhje të ngushta me Moskën ishin detyruar të luftonin, tregoi se Kremlini nuk interesohej për aleatët e tij. Në një intervistë në ambasadën ukrainase në Pretoria, ambasadori tha: "Mund të ketë të gjitha llojet e ofensivave të sharmit në kontinentin afrikan, por sapo një afrikan vjen në luftë, ai thjesht bëhet mish për top".