Lituania ka zbuluar planet për të ndërtuar një vijë mbrojtëse 50 kilometra e gjerë në kufijtë e saj me Rusinë dhe Bjellorusinë, që do të përfshijë fusha të minuara dhe ura që do të shpërthejnë në rast se Rusia nis një pushtim. Planet janë pjesë e një shtytjeje mbarëballtike për më shumë mbrojtje, mes agresionit në rritje nga Rusia. Estonia, Letonia dhe Lituania, së bashku me Poloninë, kanë forcuar kufijtë e tyre, duke shtuar pengesa dhe fortifikime në gardhet ekzistuese. Të katër vendet po kërkojnë gjithashtu fonde nga BE për këto projekte. Kur të përfundojë, vija mbrojtëse baltike vlerësohet se do të jetë më shumë se 1500 km e gjatë dhe do të kufizojë aftësinë e Rusisë për të nisur sulme nga territori i saj i Kaliningradit dhe Bjellorusia. Lituania filloi të ngrinte dhjetëra të ashtuquajtura 'parqe inxhinierike' të mbushura me pajisje që kufizonjnë lëvizshmërinë. Këto fillimisht përfshinin tela me gjemba, postblloqe betoni, barriera antitank, si dhe dhëmbë dragoi. Por Lituania tani thotë se po kërkon të shtresojë më tej mbrojtjen e saj, duke e shtrirë atë mjaftueshëm për të mbrojtur Vilniusin, kryeqytetin e vendit. Kufiri i Lituanisë me Kaliningradin dhe Bjellorusinë është mbi 950 km i gjatë. Fortifikimi i ri do të përbëhet nga tre shtresa. E para, që vlerësohet të jetë 5 km e gjerë, do të fillojë me një hendek antitank pranë gardhit kufitar. Kjo do të pasohet nga një argjinaturë me shirita dhëmbësh dragoi dhe fusha të minuara, dhe pastaj do të ketë dy shtresa të fortifikuara për mbrojtjen e këmbësorisë. Shtresa e dytë dhe e tretë do të mbajnë ura të mbushura me eksplozivë që mund të hidhen në erë si dhe më shumë linja këmbësorie. Lituania po planifikon gjithashtu prerjen e pemëve përgjatë rrugëve që të çojnë në qytete dhe fshatra, gjë që pritet të ndihmojë në shkatërrimin e automjeteve të blinduara ruse. Qëllimi i projektit të ri është të ngadalësojë sulmet tokësore dhe t'i shtyjë forcat armike në fusha betejash më të lehta, jo të parandalojë plotësisht sulmet. Lituania aktualisht ka 23,000 ushtarë profesionistë, së bashku me 104,000 rezervistë. Ajo i ka rritur shpenzimet e saj të mbrojtjes në 5.5%, një nga normat më të larta të çdo vendi të NATO-s.