Të dielën mbahen zgjedhje lokale në dy lande gjermane, të cilat mund të shtojnë presionin politik mbi Kancelarin Friedrich Merz. Sondazhet në Berlin dhe në Meklenburg-Pomeraninë Perëndimore tregojnë se Bashkimi Kristian-Demokrat i Merz-it rrezikon të pësojë humbje të rënda, çka do të ngrinte pikëpyetje të mëtejshme mbi të ardhmen e kancelarit. Këto zgjedhje të fundit vijnë pasi partia e ekstremit të djathtë "Alternativa për Gjermaninë" arriti një fitore të madhe në landin Saksoni-Anhalt dy javë më parë, ndërsa CDU-ja pa përgjysmimin e votave të saj. Në Gjermani ka pasur spekulime se Merz mund të zëvendësohet në postin e kancelarit para përfundimit të mandatit, nëse nuk përmirësohet situata politike e CDU-së. Ai ka deklaruar se do të vazhdojë detyrën, por po përballet me nivele të ulëta mbështetjeje mes zërave për një "ndryshim të kancelarit", ndonëse rivalët e tij "ende hezitojnë". Sipas sondazheve, konservatorët e Merz-it mund të humbasin pushtetin në Berlin, pasi po garojnë kokë më kokë me partinë "Die Linke" për vendin e parë. Ndërkohë, në landin verilindor të Meklenburg-Pomeranisë Perëndimore, CDU-ja mezi po qëndron mbi pragun prej 5% të nevojshëm për hyrjen e një partie në parlamentin e landit. Kjo mund të shënojë rezultatin më të dobët ndonjëherë në zgjedhjet e një landi.