Selia detare e NATO-s është hapur zyrtarisht në Gjermani për të forcuar mbikëqyrjen e Detin Baltik nga ana e aleancës, përballë kërcënimit që paraqet Rusia. Qendra Baltike e Komandës së Task Forcës në qytetin port gjerman të Rostock-ut u inaugurua ndërsa tensionet vazhdojnë të rriten mes aleancës dhe Moskës, në mesin e shqetësimeve të sigurisë të shkaktuara nga pushtimi i plotë i Ukrainës nga Vladimir Putin. Ministri gjerman i mbrojtjes, Boris Pistorius, tha se selia e re do të ndihmojë në mbrojtjen e vendeve të NATO-s nga agresioni i mundshëm rus. Anëtarët e krahut lindor të NATO-s kanë akuzuar Moskën për sulme hibride, që përfshijnë operacione të fshehta si dezinformimi, si dhe sulme kibernetike dhe bllokime të sinjalit GPS (Xhi Pi Es) mbi Detin Baltik. Rusia ka porte në Detin Baltik, në enklavën e Kaliningradit dhe rreth Shën Petersburgut. Anëtarësimi i Suedisë dhe Finlandës në aleancë ka bërë që Baltiku, që është një rrugë e rëndësishme furnizimi për aleancën dhe vendet fqinje aleate, të quhet tani "Liqeni i NATO-s". Selia e re do të drejtohet nga një admiral gjerman dhe do të ketë 60 oficerë nga 11 vende të NATO-s. Ajo do të planifikojë stërvitje të përbashkëta detare me aleatët dhe partnerët dhe do të drejtojë operacionet detare të NATO-s. Shtetet baltike kanë marrë po ashtu masa sigurie në përgjigje të asaj që ato thonë se është një kërcënim në rritje nga Moska. Lituania ka instaluar bllokada betoni kundër tankeve të njohura si "dhëmbët e dragoit" në kufirin me Kaliningradin. Ajo iu bashkua ish-republikave sovjetike të Estonisë dhe Letonisë, në shpalljen e Linjës së Mbrojtjes Baltike, ndërsa Polonia fqinje njoftoi një projekt të ngjashëm, të quajtur "Mburoja Lindore", prej 2.6 miliardë dollarësh për të forcuar kufijtë e saj me Kaliningradin dhe Bjellorusinë.