Udhëheqësja e re e Nepalit u zotua se do të plotësojë kërkesat e protestuesve për “t’i dhënë fund korrupsionit”, ndërsa ajo nisi mandatin si kryeministre në detyrë, pasi protestuesit e rinj rrëzuan nga pushteti paraardhësin e saj. Sushila Karki, 73-vjeçare, ish-shefe e drejtësisë, është ngarkuar me detyrën për të rivendosur rendin dhe për t’iu përgjigjur kërkesave të protestuesve për një të ardhme pa korrupsion, përpara zgjedhjeve që do të mbahen pas gjashtë muajsh. Protestat nisën të hënën, të nxitura nga një ndalim i rrjeteve sociale, dhe u përshkallëzuan shpejt, me Parlamentin dhe ndërtesat kryesore qeveritare që u dogjën, ndërsa protestat u rritën edhe për shkak të situatës së rëndë ekonomike në Nepal. “Ne duhet të punojmë sipas mënyrës se si mendon gjenerata Z”, tha Karki, në deklarimin e parë publik pas marrjes së detyrës. Një e pesta e njerëzve në Nepal, të moshës 15-24 vjeç janë të papunë, sipas Bankës Botërore, ndërsa GDP-ja për kokë banori është 1.447 dollarë. “Ajo që po kërkon ky grup është që të mos ketë korrupsion, të ketë qeverisje e mirë dhe barazi ekonomike. Ne duhet të jemi të vendosur ta përmbushim këtë”, shtoi ajo. Karki mbajti një minutë heshtje të dielën në nderim të atyre që u vranë gjatë trazirave, para se të niste takimet në ndërtesën kryesore qeveritare të Singa Durbarit, ku disa ndërtesave iu vu zjarri gjatë protestave masive të zhvilluara të martën. Të paktën 72 persona u vranë gjatë dy ditëve të protestave dhe 191 të tjerë u plagosën. Paraprakisht, autoritetet kishin thënë se numri i viktimave ishte 51. Këto ishin trazirat më të rënda që nga përfundimi i luftës civile dhjetëvjeçare dhe largimi i monarkisë në 2008. Emërimi i Karkit, e njohur për pavarësinë e saj, erdhi pas negociatave intensive mes kreut të ushtrisë dhe presidentit, duke përfshirë edhe përfaqësues të “Gen Z”, siç njihet lëvizja protestuese rinore. Mijëra aktivistë të rinj kanë përdorur aplikacionin Discord për të zgjedhur Karkin si udhëheqësen e tyre të preferuar. Parlamenti është shpërndarë dhe zgjedhjet në Nepal janë caktuar të mbahen më 5 mars 2026.