Britania e Madhe ka zgjedhur Sarah Mullally Kryepeshkopen e re të Canterbury-t, hera e parë që një grua emërohet udhëheqëse e Kishës së Anglisë në historinë 1,400-vjeçare të saj. Mullally bëhet gjithashtu kreu ceremonial i rreth 85 milionë anglikanëve në të gjithë botën, ndërkohë që emërimi i një gruaje në post rrezikon ndarje më të thella teologjike me disa nga degët më konservatore të kishës në vendet afrikane. Reformat e prezantuara 11 vjet më parë bënë të mundur që një grua të mbajë këtë detyrë, dhe duke u emëruar si Kryepeshkop i 106-të i Canterbury-t, Mullally bëhet udhëheqësja femër e një prej fushave të fundit të jetës publike britanike që është udhëhequr deri më tani nga burrat. Por për anglikanët globalisht, rreth dy të tretat e të cilëve jetojnë në vende si Nigeria, Kenia dhe Uganda, emërimi i Kryepeshkopes së parë femër mund të nxjerrë në pah më tej dallimin e tyre me kishën nënë në Angli. Mullally, 63 vjeç, është një ish-infermiere. Ajo ka mbrojtur krijimin e një kulture të hapur dhe transparente në kisha, e cila lejon ndryshimet dhe mosmarrëveshjet. "Ka shumë ngjashmëri midis infermierisë dhe të qenit priftëreshë. Ka të bëjë me njerëzit dhe me të qenit me ta në kohët më të vështira në jetën e tyre", i tha ajo dikur një reviste. Duke reflektuar statusin e Kishës së Anglisë, zyra e Kryeministrit Keir Starmer njoftoi vendimin me pëlqimin formal të Mbretit Charles. Si monark, Charles është guvernatori suprem i Kishës së Anglisë, një rol i vendosur në shekullin e 16-të kur Mbreti Henry VIII u nda nga Kisha Katolike. Kisha e Anglisë ka qenë pa një udhëheqës që nga nëntori i kaluar kur Justin Ëelby dha dorëheqjen për shkak të një skandali të mbulimit të abuzimit me fëmijë.