Sekretari amerikan i Mbrojtjes, Pete Hegseth, i tha Kongresit se lufta me Iranin i ka kushtuar Shteteve të Bashkuara 37.5 miliardë dollarë deri më tani, nga pothuajse 29 miliardë dollarë që ishte vlerësuar në mes të majit. Ai mbrojti ndërkohë kërkesën e Pentagonit për rreth 67 miliardë dollarë fonde shtesë. Duke dëshmuar para Komitetit për Ndarje Buxhetore të Senatit, Hegseth dhe gjenerali Dan Caine, shef i Shtabit të Përgjithshëm, thanë se financimi shtesë ishte “urgjent” dhe “i nevojshëm” për të mbuluar kostot e operacioneve ushtarake deri në fund të shtatorit. Senatorja demokrate, Jeanne Shaheen, vuri në pikëpyetje kërkesën për fonde shtesë, duke argumentuar se Pentagoni ende ka 75 miliardë dollarë të pashpenzuara dhe pyeti pse po kërkohen më shumë para “në vend që të kërkohet autorizim për transferim” të fondeve. Hegseth u përgjigj duke thënë se këto fonde janë alokuar për prioritete të tjera përfshirë projektin e mbrojtjes raketore të quajtur “Golden Dome for America” (Kupola e Artë për Amerikën).