Kremlini të hënën akuzoi autoritetet në Moldavi se kanë penguar qindra mijëra moldavë që jetojnë në Rusi, të votojnë në zgjedhjet e rëndësishme parlamentare që u mbajtën të dielën. Partia qeverisëse pro-Bashkimit Evropian në Moldavi fitoi bindshëm ndaj rivales së saj të afërt me rusinë në zgjedhjet parlamentare të së dielës, një nxitje e madhe kjo për ata moldavë që duan të bashkohen me BE-në dhe të shkëputen nga orbita e Moskës. Në një bisedë me gazetarët, zëdhënësi i Kremlinit Dmitry Peskov tha se moldavët që jetojnë në Rusi, të cilët tradicionalisht kanë më shumë gjasa të votojnë për forcat politike pro-ruse në vend, nuk kishin mundur të hidhnin votën e tyre. "Qindra mijëra moldavë u privuan nga mundësia për të votuar në Federatën Ruse për shkak të faktit se vetëm dy qendra votimi ishin të hapura për ta", tha Peskov. I pyetur nëse Moska i njihte rezultatet, Peskov vuri në dukje se disa forca politike në Moldavi kishin folur për shkelje. "Së pari, vetë moldavët ndoshta duhet ta zgjidhin këtë çështje. Për aq sa dimë ne, disa forca politike po deklarojnë mospajtimin e tyre. Ata po flasin për shkelje të mundshme zgjedhore", tha ai. Rreth 500,000 qytetarë moldavë jetojnë në Rusi, thonë zyrtarët e qeverisë ruse. Shumica e vendeve të mëdha evropiane, ku jetojnë më pak moldavë sesa në Rusi, kishin më shumë se dy qendra votimi në dispozicion për votuesit të dielën. Vetëm pak më shumë se 4,000 vota u hodhën në Rusi, sipas autoriteteve moldave, rreth dy të tretat e të cilave ishin për bllokun kryesor pro-rus. Në të kundërt, qytetarët moldavë që jetojnë në Gjermani hodhën më shumë se 38,000 vota në 36 qendra votimi të ndryshme, shumica e të cilave në mbështetje të partisë në pushtet.