Policia e Vlorës ka vënë në pranga tre persona të dyshuar për rrëmbimin dhe dhunimin e një shtetasi nga Kosova, me qëllim përfitimin e një shume prej 70 mijë eurosh. Sipas informacioneve të siguruara nga familjarët e personit të rrëmbyer, një shtetas nga Mitrovica në Kosovë, ishte mbajtur peng në një apartament në qytetin e Vlorës që prej datës 28 nëntor të këtij viti. Pasi denoncimit të bërë nga motra e pengut, që jeton në Suedi është bërë e mundur gjetja e banesës dhe shoqërimi i përsonave të përfshirë. Gjatë operacionit u arrestuan Vilson Agaj 35 vjeç, Orest Çorapaj 18 vjeç dhe Julian Zogaj 25 vjeç. Hetimet kanë zbuluar se ata kanë mbajtur peng 39-vjeçarin Fisnik Xhaka si dhe e kanë dhunuar fizikisht, ndërsa kërkonin shumën e madhe të parave për lirinë e tij. Gjithashtu, gjatë kontrolleve në apartamentin ku është mbajtur peng 39-vjeçari, u sekuestrua një sasi e dyshuar e lëndës narkotike kanabis sativa dhe një radio marrëse-dhënëse, e ngjashme me ato të policisë.