Parlamenti Europian kërkon që Serbia të normalizojë marrëdhëniet me Kosovën, dhe të tregojë përkushtim ndaj vlerave të Bashkimit Europian. Në një postim në X, parlamenti europian nënvizon se progresi drejt anëtarësimit në Bashkimin Europian është i mundur vetëm me reforma të sundimit të ligjit dhe standarde të forta demokratike. Qeveria e Serbisë vazhdon të thotë se anëtarësimi në BE është qëllimi i saj strategjik, por eurodeputetët paralajmërojnë se kjo shpesh nuk reflektohet në veprimet e saj. Pak ditë më parë, në parlamentin europian u miratua një rezolutë për Serbinë me 468 vota pro, 116 kundër dhe me 79 abstenime, ku thuhej se ekziston një hendek i vazhdueshëm midis përafrimit legjislativ të Serbisë me rregullat e BE-së dhe zbatimit aktual të reformave që vazhdon të minojë progresin e vendit. Eurodeputetët shprehin keqardhje për lidhjet e ngushta të Serbisë me Rusinë dhe për thellimin e bashkëpunimit të saj në fushën e sigurisë dhe mbrojtjes me Kinën, të cilat ngrenë shqetësime në lidhje me orientimin strategjik të vendit. Ata theksojnë se përputhja e plotë me politikën e përbashkët të jashtme dhe të sigurisë të BE-së mbetet një kërkesë e panegociueshme për anëtarësim, duke përfshirë edhe përputhshmërinë me masat kufizuese të BE-së kundër Rusisë.