Deputetët e Partisë Demokratike të Kosovës dhe të Aleancës janë mbledhur sërish në sallën plenare të Kuvendit, ku drejtuan akuza të ashpra ndaj Lëvizjes Vetëvendosje, duke e cilësuar shtyrjen e seancës konstituive si shkelje të Kushtetutës. Kryetari i PDK-së, Bedri Hamza, ka thënë se me shtyrjen e seancës po shkelen jo vetëm afatet dhe obligimet që burojnë nga rendi kushtetues, por edhe afati i interpretuar më herët nga vetë Lëvizja Vetëvendosje. Hamza: Nuk do të pranojmë që shkelja e Kushtetutës të bëhet praktikë ...Partia Demokratike e Kosovës nuk do të pranojë që të bartet shkelja e Kushtetutës, nuk do të pranojë që shkelja e Kushtetutës të bëhet praktikë, nuk do të pranojë që vendimet e gjykatave të shndërrohen në çështje të vullnetit politik. Nuk do të pranojë që një kryeministër, kushdo qoftë ai, të mund të vendosë cili institucion funksionon dhe cili jo, sepse demokracia nuk shkatërrohet brenda një dite, ajo gërryhet hap pas hapi....