Ushtruesja e detyrës së presidentes, Albulena Haxhiu, ka ftuar krerët e partive parlamentare për dialog politik dhe arritjen e një konsensusi rreth zgjedhjes së presidentit, duke paralajmëruar se mungesa e marrëveshjes mund ta çojë vendin në një proces të ri zgjedhor. Ajo ka shprehur keqardhje për refuzimin e ftesës nga Partia Demokratike e Kosovës dhe Aleanca për Ardhmërinë e Kosovës, duke e cilësuar vendimin e tyre si të gabuar dhe mungesë vullneti për tejkalimin e dallimeve. “Pavarësisht ftesës sime të sinqertë, subjektet politike si PDK dhe AAK refuzuan të njëjtën. Këtë refuzim e konsideroj veprim të gabuar, të pamatur dhe mbi të gjitha mungesë të vullnetit për të tejkaluar pozicionimet barrikaduese. Të tilla pozicione nuk e ndihmojnë askënd, aq më pak Republikën tonë.”, shkroi Haxhiu në rrjetet sociale duke theskuar se pa dialog ndërmjet forcave politike nuk mund të gjendet një rrugëdalje. Sipas saj, megjithëse zgjedhja e kreut të shtetit është hapi i tretë në aspektin formal të krijimit të institucioneve, në rrethanat aktuale kjo temë duhet të trajtohet e para. “Është evidente që pa marrëveshje për të i çelet rrugë një procesi të ri zgjedhor, që praktikisht nuk do të sjellë asgjë të re. Aq më pak zgjidhje.”, theksoi ajo. Në fund, Haxhiu ka shprehur shpresën se deri të martën partitë do të reflektojnë dhe takimi I thirru në orën 9:00 do të shërbejë për gjetjen e një zgjidhjeje politike.