Partia Demokratike akuzon Komisioni Qendror të Zgjedhjeve se nuk i ka vënë ende në dispozicion pamjet filmike të të gjitha qendrave të votimit të 11 majit në vend dhe as dokumentacionet zyrtare mbi kthimin e zarfeve të votës së diasporës. Përmes një shkrese drejtuar zyrtarisht KQZ-së, opozita përsërit kërkesat e saj dhe në dijeni ka vënë edhe misionin ndërkombëtar të vëzhguesve të OSBE/ODIHR. PD pretendon se në 11 maj u aplikua masivisht treni bullgar, ku komisionerët e Partisë Socialiste nxorrën fletët e votimit jashtë qendrës dhe i plotësuan vetë ato. Veç kësaj, PD ka denoncuar përmes kryetarit të saj, Sali Berisha edhe votimin masiv dhe ka përsëritur qëndrimin se 11 maji ishte një farsë, që opozita thotë se nuk do ta njohë kurrë. Për të siguruar mbështetje ndërkombëtare në lidhje me këto pretendime, Sali Berisha ishte këtë javë në asamblenë parlamentare të OSBE, ku mbajti edhe një fjalim.