Partia Demokratike tërhiqet nga procesi për zgjedhjen e avokatit të ri të popullit. Tradita parlamentare, sipas së cilës kjo zgjedhje i është lënë në dorë opozitës, mund të cënohet gjatë kësaj legjilature. Shkak, sipas kryedemokratit Sali Berisha, është bërë përfshirja e Endri Shabanit në listën e kandidatëve dhe mundësia që me forcën e kartonit shumica parlamentare të votojë këtë kandidaturë. Demokratët e cilësojnë votimin farsë, në kushtet kur ata i tërhoqën firmat, por kjo nuk u mor parasysh nga shumica parlamentare, me argumentin se tërheqja ishte në tejkalim të afateve ligjore. : “Në qoftë se ia lënë PD-së, ne u treguam të arsyeshëm, ne nuk thamë ose ky, ose asnjë tjetër. Ne paraqitëm disa kandidatura, ata shtuan kandidaturën e tyre. Është Endri Shabani. PD tërhiqet nga procesi. PD nuk merr pjesë në proces. Ky është një turp i tyre. Para katër ditësh siç e dini ju deklaruan se ia lamë opozitës, ia lamë PD-së, dhe tani thonë nuk njohim tërheqjen e firmave. Firmat janë të tërhequra dhe ne nuk marrim pjesë në process.”