Një ditë pas Kuvendit të Berishës, kryedemokrati Lulzim Basha thirri një mbledhje urgjente të Këshillit Kombëtar të Partisë Demokratike, në të cilën u miratua një rezolutë, në thelb të së cilës ishin masat kundër atyre që janë vendosur në komisionin e rithemelimit të partisë demokratike, apo që kanë qenë anëtarë të kryesisë deri të shtunën. Por pjesëmarrja e tyre në Kuvendin e thirrur nga Berisha ka bërë që Basha të nisë një procedurë për shkarkimin e tyre, e cila u votua në bllok nga anëtarët e këshillit kombëtar. Nga 484 anëtarë të këtij këshilli, ishin prezent 291, duke plotësuar në këtë mënyre kuorimin e duhur për vendimmarrje. Pavarësisht se mbledhja e Këshillit Kombëtar u zhvillua me dyer të mbyllura, nga salla dolën deklarata të anëtarëve të ndryshëm, ku mes tyre ka pasur edhe debate për zhvillimin e së shtunës, por edhe vendimmarrjen e kësaj të diele.