Kryetari I grupit të PD, Gazment Bardhi reagoi pas kërkesës drejtuar Gjykatës Kushtetuese nga ana e presidentit Bajram Begaj për çështjen e mbarimit të mandatit të gjyqtares Sonila Bejtja. Përmes një reagimi Bardhi e quajti një akt të pashembullt në emër dhe për llogari të Edi Ramës me qëllim, sipas tij, kapjen Gkjykatës Kushtetuese. “Akti i pashëmbullt i Bajram Begajt, në emër dhe për llogari të Edi Ramës, për të kapur 100 % Gjykatën Kushtetuese, është jo vetëm i dënueshëm, por edhe i papranueshëm. Kushtetuta qartësisht i ka dhënë gjyqtarëve në detyrë një mandat të plotë 9 vjeçarë, që nuk mund të cenohet në asnjë rrethanë pas fillimit të detyrës. Cënimi i mandateve nënkupton cenimin e vetë pavarësisë së Gjykatës dhe parimeve themelore të shtetit të së drejtës.”, thuhet në reagimin e Bardhit që e quan kreun e shtetit një ushtar të bindur të kryeministrit Rama. “me aktin e sotëm Bajram Begaj nuk ka surprizuar askënd për rolin e tij si ushtar i bindur i Edi Ramës, por guximi i tij për të shkuar deri tek hedhja në erë e Kushtetutës vetëm që Edi Rama ta rrëmbejë Gjykatën Kushtetuese 100 %, është përtej pritshmërisë së shërbimeve edhe nga ushtari me gradën më të ulët.”, thekson ai ndërsa dënon me forcë këtë akt dhe I kërkon kreut të shtetit që të ndalet menjëherë pasi rrezikon legjitimitetin e Gjykatës Kushtetuese.