Sekretari i Përgjithshëm i Partisë Demokratike Gazment Bardhi ka reaguar pas deklaratave të kryeministrit Edi Rama se Kodi Zgjedhor i kthyer për rishqyrtim në Kuvend nga presidenti Ilir Meta do miratohet ashtu siç është, pa asnjë ndryshim. Sipas Bardhit, Edi Rama duhet të shpjegojë pse ka frikë nga ekspertiza e Komisionit të Venecias dhe pse i trembet zgjedhjeve demokratike sipas standarteve europiane. Zyrtari i lartë demokrat tha se shqiptarët nuk i kanë borxh Edi Ramës pengmarrjen e Shqipërisë. “Refuzimi brutal i Edi Ramës ndaj apelit të Komisionerit për Zgjerimin në BE z. Oliver Varhelyi është një tjetër dëshmi që për Partinë Socialiste interesi i mafias është mbi interesin e Shqipërisë. Asnjë Kryeministër më parë nuk ka vënë në rrezik integrimin europian të Shqipërisë dhe nuk ka sfiduar hapur Bashkimin Europian për llogaritë e tij politike të ditës” thuhet ne postimin e Bradhit në rrjetet sociale. Kodi Zgjedhor u kthye për rishqyrtim në Kuvend nga kreu i shtetit i cili njëkohesisht njoftoi se i është drejtuar me një kërkesë urgjente Komisionit të Venecias për një opinion të specializuar dhe objektiv mbi këtë proces.