Partia Demokratike ka paditur në SPAK, drejtorin e Përgjithshëm të Policisë së Shtetit, Ardi Veliu. Sipas njoftimit të Partisë Demokratike, Veliu është paditur , për të paktën 5 vepra penale që policia ka kryer gjatë protestave për vrasjen e Klodian Rashës. PD e ka paditur kreun e policisë së shtetit për veprat penale: Shpërdorim i detyrës, Kryerja e veprimeve arbitrare, Pengimi në të drejtën për t’u shprehur, grumbulluar dhe manifestuar, Dëmtime të tjera me dashje dhe Mosmarrja e masave për të ndërprerë gjendjen e paligjshme. PD kërkon nga SPAK pezullimin nga detyra të Ardi Veliut si drejtor I përgjithshëm I Policisë së Shtetit deri në përfundimin e hetimeve. Sipas Partisë Demokratike, Veliu ka urdhëruar që të përdoret dhunë ndaj protestuesve. Në padinë penale ndaj kreut të Policisë, theksohet se “në protestat paqësore për të kundërshtuar frymën e represionit policor dhe të abuzivizmit qeverisës, është vënë re përdorim i tepruar i dhunës policore, përdorimi në mënyrë të çmendur i gazit lotsjellës. Ai është hedhur në sasi shumë të mëdha në Bulevard dhe në zonat rezidenciale me densitet të lartë qytetarësh, që nuk ishin pjesë e protestës”. Duke i vënë në dispozicion SPAK-it fakte konkrete, në padi theksohet se, me urdhër të Ardi Veliut, është ushtruar dhunë barbare ndaj të miturve, kanë ndaluar në mënyrë abuzive çdo njeri që lëvizte në rrugë, pa qenë pjesë e protestës.