Partia Demokratike mbledh pasditen e kësaj të mërkure në orën 18:00 Këshillin Kombëtar, ku pritet të zgjidhet ekipi i ri drejtues. Konkretisht, Këshilli Kombëtar do të votojë për zgjedhjen e Sekretarit të Përgjithshëm, nënkryetarëve të PD-së, Sekretariatit të Partisë Demokratike, si dhe Komisionit të Apelimit. Kjo mbledhje vjen pas asaj të 1 korrikut, ku Këshilli Kombëtar i Partisë Demokratike zgjodhi kryetarin e këtij organi dhe 20 anëtarë të Kryesisë së partisë. Me zgjedhjen e strukturave të reja drejtuese, demokratët synojnë të konsolidojnë ekipin politik që do të jetë në krah të Berishës në drejtimin e opozitës dhe në përballjet e ardhshme politike. Ndërkohë Ivi Kaso, i cili për 12 vite ka shërbyer si drejtues i Sekretariatit për Çështjet Ligjore dhe Zgjedhore të Partisë Demokratike, ka njoftuar më herët se nuk do të kandidojë sërish për shkak të angazhimeve që ka si deputet, anëtar i Kryesisë së PD dhe nënkryetar i Komisionit për Nismat Qytetare, Bashkëpunimin, Mbikëqyrjen Institucionale. Kryedemokrati Berisha vazhdimisht e ka cilësuar këtë proces si ripërtëritje të partisë në mënyrë për të përmbushur misionin e saj.