1 muaj para zgjedhjeve parlamentare Partia Demokratike ka nënshkruar një kontratë lobimi në SHBA vlera totale e së cilës nëse do të përmbushet e plotë për 2 vite bashkëpunim do të kapë shifrën 6 milionë euro. Garant për këtë kontratë lobimi ka dalë Fondacioni Shqiptaro Amerikan, i cili njëherësh do të paguajë paratë pranë kompanisë nëpërmjet nënshkruesit të saj Nuredin Seçi dhe ish këshilltarit të presidentit Trump, Carlo Trujillo, në cilësinë e Presidentit të Continental Strategy. Kontrata parashikon një pagesë prej 250 mijë dollarësh në muaj, për aq kohë sa do të zgjasë, me të drejtë prishjen e saj nga secila prej palëve, por duke lajmëruar për anulimin 30 më parë. Kontrata mban nënshkrimin e Sekretarit të Përgjithshëm të Partisë Demokratike Flamur Noka. Kontrata parashikon që kompania lobuese zyrtarisht të ofrojë shërbim për “Krijimin e marrëdhënieve me aktorët kryesorë në qeverinë dhe kongresin e SHBA-ve për forcimin e demokracisë në Shqipëri”, ndërsa jozyrtarisht lobimi synon heqjen e non gratës së Berishës para zgjedhjeve të 11 majit, pasi sicc pretendon opozita, statusi non grata ndaj kreut të PD është produkt i një afere ndërkombëtare korruptive, ku është përfshirë Edi Rama. Burime nga Partia Demokratike i thanë Top News, se gjithçka e publikuar nga kontrata është e saktë, por nuk janë paguar 6 milionë euro. Sipas të njëjtave burime, kontrata do të rishqyrtohet çdo muaj nga PD nëse do të duhet të vijojë apo jo.