Partia Demokratike zyrtare ka kallëzuar në SPAK kryetaren e Kuvendit Lindita Nikolla, të cilën e akuzon për për pengim me dashje të zbatimit të vendimeve të Gjykatës Kushtetuese. Kallëzimi është depozituar me firmën e Sekretarit të Përgjithshëm të PD-së, Enkelejd Alibeaj. Në të kallëzohet kryetarja e Kuvendit për dy vepra penale, atë të shpërdorimit të detyrës dhe të pengimit të zbatimit të vendimit të gjykatave në lidhje me projektligjin për votën e diasporës. Vendimi numër 38, datë 9 dhjetor 2022 i Gjykatës Kushtetuese detyron Kuvendin që të ndërmarrë të gjitha nismat ligjvënëse për të siguruar votën e emigrantëve shqiptarë. PD zyrtare thotë se përgjatë të gjithë vitit 2023, në tre periudha të ndryshme, kryetarja e Kuvendit e zvarriti zbatimin e këtij vendimi. Konkretisht, sipas PD, nga 12 janari deri më 10 mars, Nikolla nuk thirri mbledhjen e Këshillit të Legjislacionit, siç e kërkon rregullorja e Kuvendit.