Partia Demokratike ka zhvilluar këtë të hënë një takim me të Dërguarin Special të Presidentit amerikan Donald Trump për Partneritetet Globale, Paulo Zampolli. Në takim morën pjesë Sekretari i Përgjithshëm i PD-së, Flamur Noka, kreu i Grupit Parlamentar, Gazment Bardhi dhe kryetarja e Komisionit për të Drejtat e Njeriut, Jorida Tabaku. Gjatë takimit u diskutua situata politike, institucionale dhe ekonomike në Shqipëri. Demokratët ngritën shqetësimin për atë që e konsiderojnë ‘kapje të shtetit’, duke akuzuar qeverinë Rama për kontroll politik mbi institucionet. Një pjesë e veçantë e diskutimeve iu kushtua edhe zgjedhjeve. Përfaqësuesit e PD-së pretenduan se përdorimi i parave të paligjshme, keqpërdorimi i administratës publike dhe lidhjet mes politikës dhe krimit kanë deformuar vullnetin e qytetarëve. Nga ana tjetër, PD ka njoftuar se i dërguari i Trump Paulo Zampolli shprehu gatishmërinë për bashkëpunim me opozitën dhe për të ndihmuar Shqipërinë të ecë përpara në proceset demokratike. PD deklaroi se do të vijojë të kërkojë forcimin e marrëdhënieve strategjike me Shtetet e Bashkuara.