Partia Demokratike ka akuzuar qeverinë për abuzime me koncesionin e hemodializës, duke e cilësuar atë si një prej rasteve të keqmenaxhimit të fondeve publike në shëndetësi. Në një deklaratë për mediat, Sekretari për Aksionin Qytetar në PD, Erges Eskiu, deklaroi se Klodian Allajbeu, pronar i disa rrjeteve spitalore private rezulton përfituesi më i madh i koncesionit të hemodializës. ‘Klodian Allajbeu, pronari i rrjeteve të Spitalit Amerikan dhe Hygeia, rezulton si përfituesi më i madh i koncesionit të hemodializës, i cili, sipas Kontrollit të Lartë të Shtetit, vetëm në gjashtë vjet ka përlarë 15.1 miliardë lekë, ose rreth 150 milionë euro. Nga këto para, vetëm një pjesë e vogël kanë shkuar për pagesa në qendrat spitalore publike, ndërsa pjesa tjetër ka shkuar për të kënaqur oreksin e Klodian Allajbeut nëpërmjet kompanisë Dia Vita dhe rrjetit të tij të spitaleve. Sa për ilustrim dhe për të krijuar një ide se si janë shpërndarë fondet, vetëm në vitin 2022, nga 193,878 seanca të kryera gjithsej, vetëm 10,766 u kryen në spitalin publik, ndërsa 183,112 seanca, ose 94.4%, u kryen nga privati dhe PPP-ja e Klodian Allajbeut.’