Koha që na ndan nga 6 Marsi, data kur do të mbahen zgjedhjet vendore në 6 bashkitë pa kryetar, është shumë e shkurtër. Këto zgjedhje mbahen në një kohë tensioni në Partinë Demokratike për shkak të përplasjes Basha-Berisha. Mes këtyre të fundit, duket se nuk do të ketë paqë dhe të dy duken të vendosur për të dalë me kandidatë më vete. Komisioni Qendror i Zgjedhjeve këtë të shtune qartësoi se njeh vetëm PD-në e udhëhequr nga Lulzim Basha dhe se ish-kryeministri Sali Berisha nuk ka të drejtë të përdorë as logon dhe as vulën e partisë. Për këtë arsye, prej disa ditësh Berisha ka nisur negociatat me aleatët e PD-së për t’u futur si koalicioni në zgjedhjet e 6 Marsit, ose në të kundërt, kandidatët e tij do të garojnë si të pavarur. Por, pavarësisht teknikaliteteve sesi do të garojnë të dyja palët, ajo që vlen të theksohet është se ndarja e demokratëve me dy kandidatë bën që mundësitë për të fituar më 6 Mars janë shumë të pakta. E ndarë në dy palë, Partia Demokratike rrezikon të humbasë edhe bashkinë e Shkodrës, e cila njihet si një bastion i të djathtës.