Partia Demokratike ka depozituar 15 amendime në Kuvend për projektligjin e buxhetit të shtetit për vitin e ardhshëm. Propozimet e opozitës shtrihen nga pensionet, te mbështetja për fermerët, shëndetësia, arsimi dhe pagat e administratës. PD propozon pesëfishim të fondit për rritjen e pensioneve, nga 16 milionë euro që kanë parashikuar socialistët në 80 milionë euro. Propozohet rritja e buxhetit për arsimin dhe atij për shëndetësinë me nga 1 për qind çdo vit, deri kur të arrijë shifrën e 5 për qind të Prodhimit të Brendshëm Bruto. PD kërkon 60 mln euro shtesë për fondet e barnave të rimbursueshme dhe pezullim të pagesave buxhetore për sterilizimin, check up dhe koncesionin e laboratorëve. Propozohet rritja me 10 për qind e pagave në administratë, 50 mln euro mbështetje për prodhimin vendas dhe 120 mln euro subvencione për fermerët. Opozita propozon përgjysmimin e shpenzimeve operative të qeverisjes vendore dhe asa qendrore dhe ulje të kostos së ndërtimit të rrugëve me dhjetë herë, duke e zbritur në nivelet e Bashkimit Europian, siç thotë PD. Kreu i demokratëve, Sali Berisha tha se me këto propozime opozita i jep përparësi njeriut dhe pastaj kapitalit fizik.