Pavioni Covid në Durrës drejt mbylljes, po trajtohen pacientët e fundit post-Covid. Aktualisht, spitali i Durrësit mund të konsiderohet pa covid. Pavioni Covid I ngritur pranë Infektivit është drejt kthimit në normalitet dhe në të, nga 6 pacientë që kishte në fundjavë, sot kanë mbetur vetëm dy të shtruar që sipas burimeve spitalore janë negativizuar, por po trajtohen për probleme shëndetësore që u ka lënë infektimi nga virusi. Ulja e ndjeshme e numrit të të infektuarve ka ndikuar në këtë vendimmarrje të Ministrisë së Shëndetësisë, ndërsa çdo rast me Covid-19 që do të paraqitet në spital ditët e ardhshme do të dërgohet për trajtim në spitalin Covid 1, në mënyrë që spitali t’i rikthehet normalitetit. Pavioni Covid në Durrës u hap në shkurt të këtij viti, kur numri i infektimeve ditore në vend ishte mbi 1100. Në 70 shtretërit që u vunë në dispozicion, janë trajtuar dhe shëruar dhjetra raste, ndërsa një pjesë e tyre fatkeqësisht e humbën betejën me sëmundjen. Në një qark të madh si Durrësi, i dyti në vend pas Tiranës, raportohen zyrtarisht vetëm 9 raste aktive me Covid-19.