Kili është një nga vendet që është konsideruar si histori suksesi në përpjekjen për të vaksinuar popullatën, por kjo nuk e ka ndalur atë të regjistrojë një rekord infektimesh. Ditët e fundit, numri ditor i infektimeve të raportuara ka shkuar në mbi 9 mijë, dhe kjo është hera e parë që nga fillimi i pandemisë që regjistrohet një shifër e tillë ditore. Në mes të qershorit të vitit të kaluar, shifra më e lartë e të infektuarve ditorë të regjistruar në vend, ishte 7 mijë. “Është shqetësuese”, tha ministri i shëndetësisë në kili, Enrique Paris. “Ne po kalojmë një moment kritik të pandemisë. Ju kërkoj të kujdeseni për veten, për të dashurit dhe familjet tuaja”. Njësitë e kujdesit intensiv edhe një herë tjetër janë mbingarkuar dhe vendi ka mbyllur për të dytën herë kufijtë për këdo që nuk është banor i Kilit e pjesa më e madhe e 18 milionë banorëve janë rikthyer në izolim. “Duket sikur po bëjmë hapa prapa”, thotë një kilian. “Ne duhet të shkarkojmë leje të posacme online në mënyrë që dy herë në javë të mund të dalim për të blerë ushqime apo për vizitë tek doktori”, shtoi ai.