Kryeministri Edi Rama ka reaguar sërish pas përgjigjes së Byrosë Kombëtare të Hetimit lidhur me një inicdent, ku ai akuzoi agjentët për mungesë etike dhe profesionalizmi. Në një prononcim të tij, Rama përmendi një episod të ndodhur më 20 nëntor në Këshillin e Ministrave, ku hetuesit e BKH-së ishin të ngarkuar për ekzekutimin e një vendimi gjykate që lidhej me pezullimin e Zëvendëskryeministres, Belinda Balluku. Sipas Ramës, agjentët e BKH kishin refuzuar të dorëzonin armët në hyrjen e Këshillit të Ministrave, duke shkaktuar një situatë të tensionuar. Pas kësaj në një reagim BKH hodhi poshtë akuzat e kryeministrit dhe theksoi se nuk ka patur asnjë debat apo përplasje mes gardës dhe hetuesve të Byrosë, duke u shprehur se një nga hetuesit ka kërkuar sqarim për sigurinë e armëve. Në reagimin e dytë të Ramës thuhet se episodi i 20 nëntorit është pjesë e një fenomeni të gjerë të mungesës së etikës dhe profesionalizmit në institucionet e drejtësisë.