Zëdhënësi i parlamentit iranian, Ebrahim Rezaei, tha të martën se vendi mund të pasurojë uraniumin deri në 90%, një nivel që konsiderohet gradë e armës bërthamore, nëse Irani sulmohet përsëri. "Një nga opsionet e Iranit në rast të një sulmi tjetër mund të jetë pasurimi në 90%. Ne do ta shqyrtojmë këtë mundësi në parlament", tha Rezaei, i cili është zëdhënës i komisionit parlamentar të sigurisë kombëtare dhe politikës së jashtme. Presidenti amerikan Donald Trump, tha të hënën se armëpushimi mes SHBA-së dhe Iranit ishte në "mbështetje të jetës" pasi hodhi poshtë një propozim iranian, duke nënvizuar se sa të brishta mbeten përpjekjet diplomatike për t'i dhënë fund konfliktit. Qershorin e kaluar, Trump tha se objektet bërthamore të Iranit u "shkatërruan" nga sulmet e SHBA-së dhe Izraelit gjatë një lufte 12-ditore, duke kufizuar rëndë kapacitetin e Iranit për të pasuruar uranium. Fati i rreth 400 kg uranium të pasuruar në 60%, një hap i shkurtër teknik nga pasurimi 90 për qindësh i gradës së armëve, mbetet i paqartë. Vlerësimet e inteligjencës amerikane sugjerojnë se programi bërthamor i Teheranit nuk do të pengohet ndjeshëm nëse rezervat e uraniumit të pasuruar shumë nuk largohen nga vendi ose shkatërrohen. Çështja bërthamore ka qenë një pikë kyçe e mosmarrëveshjes në bisedimet mes SHBA-së dhe Iranit për t'i dhënë fund konfliktit që filloi në fund të shkurtit. Teherani dëshiron që temat bërthamore të diskutohen në një fazë të mëvonshme, ndërsa Uashingtoni këmbëngul që Irani duhet të zhvendosë rezervat e tij të uraniumit të pasuruar shumë jashtë vendit dhe të heqë dorë nga pasurimi në vend. Një ditë më parë, kryeministri izraelit, Benjamin Netanyahu tha se lufta me iranin do të vazhdojë për sa kohë që vendi ka rezerva uraniumi të pasuruar.