Bashkimi Evropian njoftoi të premten se ka ofruar 48 miliardë dollarë ndihma ushtarake për Ukrainën, që nga nisja e agresionit rus në vitin 2022. Blloku gjithashtu do të ofrojë ndihma ushtarake dhe civile për Ukrainën duke përdorur pasuritë e konfiskuara ruse me një vlerë prej rreth 300 miliardë dollarë, raporton zëri i amerikës. “Ne do të japim këstin e parë për Ukrainën nga pasuritë e ngrira ruse. Janë rreth 1.55 miliardë dollarë. Një pjesë e kësaj shume shkon drejtpërdrejt në Ukrainë për të nxitur industrinë e mbrojtjes ukrainase.”, tha Josep Borrell, Shefi i Politikës së Jashtme të BE-së i cili njoftoi se brenda muajit mars do të kalojë dhe pjesa e dytë e ndihmës. Por Moska tha se transferimi i parave drejt Ukrainës, nga pasuritë e ngrira ruse është “vjedhje” dhe paralajmëroi për pasojat ligjore. Grupi i Shtatë vendeve kryesore të industrializuara, ose G7, gjithashtu ka rënë dakord që të përdorë pasuritë e ngrira ruse për të ofruar ndihmë për Ukrainën edhe pse kjo skemë ende nuk është finalizuar. Gjermania njoftoi këtë muaj se mund të përdorë mekanizmin e G7-ës për të zëvendësuar ndihmën e saj ushtarake për Ukrainën, pasi Berlini po përpiqet të shkurtojë shpenzimet. Gjermania është donatori i dytë më i madh i Ukrainës, pas Shteteve të Bashkuara.