Perëndoria e pasurive të grupit të akuzuar nga SPAK për trafik ndërkombëtar droge të udhëhequr nga Dritan Gjika dhe Eldi Dizdari shtrihej nga Shkodra, në Gjirin e Lalëzit, Durrës, Elbasan dhe deri në Jalë e Sarandë. Mes vilave dhe hoteleve, SPAK njoftoi se ka sekuestruar 121 pasuri të patundshme ndërsa në total janë 491 sekuestrime, ku përfshihen 200 llogari bankare, makina luksoze dhe prona të tjera. SPAK përllogarit se vlera totale e pasurive të sekuestruara shkon në 150 milionë euro, por hetimet e mëtejshme mund të zbulojnë se investimet e grupit në Shqipëri janë shumë më tepër se kaq. Bien në sy se vetëm në kompleksin turistik në Hamallaj, Lalzi Marina Seaside janë sekuestruar 121 vila, apartamente, dublekse, parkime, e mjete. Nën sekuestro është vendosur edhe një hotel i njohur më arkitekturën e tij në Jalë, konsideruar si hotel me 5 yje dhe 200 dhoma. Në Tiranë është sekuestruar një tjetër hotel, pjesë e brandit ndërkombëtar Melia. Vila janë sekuestruar edhe në rezidenca në Tiranë, te Diamond Hill, te Astoria në Mjull Bathore, ndërsa janë bllokuar edhe disa shoqëri me aktivitet në fushën e ndërtimit, konsulencës ligjore dhe deri te siguria fizike.