Pasuritë e vendosura nga të ardhurat e siguruara nga krimi i organizuar do të vendosen në shërbim të komunitetit. Ministria e Brendshme thotë se të gjitha pronat dhe asetet e konfiskuara nuk do të kthehen pas tek familjarët e tyre dhe as nuk do të trashëgohen por do të vendosen në shërbim të interesit publik. Agjencia e Administrimit të Pasurive të Sekuestruara dhe Konfiskuara pranë Ministrisë së Brendshme, ka hapur një thirrje për financim projektesh të dedikuara për organizatat jofitimprurëse që synojnë të shndërrojnë këto pasuri të krimit në projekte me impakt real shoqëror. Fondi I vendosur në dispozicion është 150.000 euro. Qëllimi i mbështetjes financiare është parandalimi i kriminalitetit dhe rehabilitimi social, kulturor dhe shëndetësor i shtresave në nevojë, veçanërisht i personave dhe grupeve të prekura ose të rrezikuara nga krimi i organizuar, trafikimi dhe forma të tjera të kriminalitetit. Në një postim në facebook, ministrja Albana Koçiu ftoi të gjitha organizatat e shoqërisë civile që të bëhen pjesë e këtij projekti deri më datë 9 Mars.